حلويات الصابلي بأشكال منوعة بالصور

تتميز حلوة الصابلي بالمذاق الرائع وبسهولة التحضير مما زادها شهرة

اليكم أنواع مختلفة من حلويات الصابلي بطريقة سهلة

المقادير

250 غ زبدة إديال أو لذة

250 غ سنيدة

كأس زيت

2 بيضات 

1/2 خمارة و 1 فاني

الدقيق حسب الخليط

نجمع كل العناصر و ندخل العجين الثلاجة ترتاح شي 1/2 ساعة ممكن تبات

على فكرة هاد المقادير ديال الأخت monaa100 الله يجازيها كل الخير

طبعا هادا هو الأساس و كنغيرو في النكهات قشرة حامض محكوكة أو برتقال أو نشريو نكهات...

ندوزو للشكل الأول:

نسرحو العجين فوق بلاستيك و نقطع مربعات

النصف نزوقوه بخليط:بيضة+نسكافي+شكلاط غبرة نسرحوه بفرشاة على المربعات و نخطط بفورشيط و هنا أشكر الأخت نجاة تادلة على هاد الطريقة الله يجازيك كل الخير

نلصق كل 2 بالكليكوز

ندهن حتى الجناب بالكليكوز و ندوزوهم في اللوز مهرمش أو كاوكاو

الشكل الثاني:

نطلقو العجين و نقطعو دوائر كبار و صغار و ندخلوهم الفرن

الدوائر الصغار ندهنوهم بالكليكوز و ندوزوهم في كاوكاو أو اللوز على حسب

ثم نلصقو دائرة صغيرة فوق وحدة كبيرة و نحطو قطيرة د الكليكوز و نضع فوقها حبة شكلاط pépite de chocolat 

الشكل الثالث:

نزوقو العجين بهاد الدلاك المشرط إما في اتجاه واحد أو اتجاهين

و نقطع مثلثات

نلصقو كل 2

نغطس الرؤوس في الشكلاط دايب ثم ا لشكلاط محكوك

هادو بالشكلاط الأبيض

هادا الشكل النهائي

ممكن أيضا تقطعو قلوب و تزينوها 

و نزولا عند طلب الأخت ام سلم إليك هاد الصابلي

أختي نفس المقادير و نضيف بودرة الكاكاو ثم نقطع دوائر تدخل الفرن 

نلصقو من بعد كل 2 و ندهن النصف الأعلى بالكليكوز و نفند في اللوز مهرمش ثم نعمل خطوط بالشكلاط الأبيض

و هادا هو أوريو ديالنا ههههههه

هاد الشي اللي كاين جربوهم وكما قلت لكم هادا صابلي ساهل ديال ديما

عيدكم مبارك سعيد تعيدو و تعاودو باش كتمناو إن شاء الله و دعيوا مع أختي أنا و ياها صاوبنا هاد الخير دعيوا معاها يسهل عليها الله و يكمل عليها بالخير إذا كان واحد الموضوع فيه خير

شكرا لزيارتكن