الفلفل معمر بالكفتة والروز بالصور

الفلفل معمر بالكفتة والروز

كنغسلوا الفلفل مزيان و نقيوه من داخل نحيدولو البذور فحال هاد الشكل و نخليوهم على جنب

في الحشوة كنحتاجوا

ربع كيلو من الكفتة

زلافة د الروز (ماشي مسلوق)

بيضة

واحد ساشي د الزعفران 

واحد ماطيشة كبيرة

واحد البصلة كبيرة 

شوية د المعدنوس

ملعقة صغيرة د الفلفل حمرا 

شوية د الملح و الابزار

فواحد جبانية كنحكو ماطيشة و البصلة و نضيفو المقادير كاملين البيضة و الكفتة و زلافة د الروز و المعدنوس مدقدق و التوابل

كنخلطو كلشي مزيان حتى كتجانس المقادير كلها 

ها الحشوة واجدة كنعمروا الفلفل ديالنا فحال هاد الشكل 

ندوزو لاصوص د ماطيشة اللي كترافق الفلفل معمر كنحتاجوا

6 د ماطيشات كبارين 

3 ضروس د الثوم 

شوية د المعدنوس 

ملعقة كبيرة د صلصة د ماطيشة د عايشة

شوية د صلصة د solis

ملعقة صغرة د الفلفل حمرا 

ملعقة صغيرة د الكمون

ملح و ابزار

كويس صغير د الزيت الزيتون

كنحكو ماطيشة هي و الثوم و ندقدقو المعدنوس نضيفو التوابل و زيت الزيتون نعملوا كلشي فشي طنجرة صغيرة على نار هادئة 

نخليوها تشحر مزيان بلا منزيدولها الماء باش تلبى فحال هيدا 

من بعد متشحر لاصوص كنعملو الفلفل ديالنا ف ديك طنيجرة و نزيدوا شوية د الماء و نغطيوها نخليوه يطيب واحد 20 دقيقة

و ها هو ملي طاب 

كنعملو المرحلة د الفران كنحكو واحد شوية د الجبن الاحمر 

كنشبرو الفلفل ديالنا و كنزلوه ف شي مول ديال الفران هو و لاصوص د ماطيشة و كنزوقوه بالجبن فحال هاد الشكل

كندخله ن الفران يتحمر و ها الشكل ديالو من بعد ما خرجتو 

بالصحة والراحة